"Sarı şerit" areketiniñ faalleri Aqmescit, Aqyar, Yalta, Kezlev ve Bağçasarayda qarşılıq timsallerini yerleştirerek Ukrayina destegine nevbetteki aktsiyasını keçirdiler. Mütenasip fotoresimler areketniñ telegram kanalında yerleştirildi.
Aktsiya, Rusiye akimiyeti tarafından soqaqlarnı baqıp çıqqan ve ukrain tirenüv timsallerini yoq etken vatandaşlar patruliniñ çalışmasına baqmadan keçirildi.
"Tirenüv devam ete. Aqmescit, Aqyar, Yalta, Kezlev, Bağçasaray Ukrayinadır! "Sarı şerit" areketiniñ faalleri işğal etilgen şeerlerni tirenüv timsallerinen toldurmağa devam eteler. Aqmescitte, söz sırası, işğalciler, soqaqlarnı teşkermek ve ukrayin tarafdarları olğan er şeyni yıqmaq/boyacaq ayrı bir vatandaşlıq saba patrulini yolladılar. Amma biz çoq ve küçlümiz", — dep aytıla areketniñ beyanatında.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.