Ukrayina Tış işler naziri Andriy Sıbiğa musulman memleketleri, cemiyet ve teşkilâtlarını Rusiyeniñ «Umma» Ukrayina musulmanları diniy idaresiniñ baş camisi ve Kyivdeki İslâm medeniyet merkezine qarşı raketa darbesini takbih etti.
Tış işler naziri bu kene «Moskvannıñ insaniyetlikniñ esas temellerine qarşı cinaiy cenk alıp barğanını» ve «Rusiye terrorı kimseni acımağanını» köstere, dep qayd etti.
«Bütün musulman memleketleri, halqara ükümet ve ükümetten tış teşkilâtları, musulman cemiyetlerini fikrini bildirip, cevap bermege ve bu darbeni takbih etmege çağıramız», – dep qayd etti Sıbiğa.
Rusiye darbesi neticesinde cami zarar körgenini müfti Murat Suleymanov haber etti. Cami binasınıñ pencere ve qapuları qırıldı. Komplekste gimnaziya ve Ukrayina musulmanları kongressiniñ ofisi bar, olar da büyük zarar kördi.
Ukrayina prezidentiniñ Qırım Muhtar Cumhuriyetindeki temsilciligi bu darbeni «Rusiyeniñ daa bir cenk cinayeti» dep adlandırdı. «Mesken evler, din ve medeniyet binalarına qarşı darbeler – vatandaş ealisini qorquzmaq içün yapılğan daa bir terror», – dep qayd etti müessise.
Akimiyetniñ malümatına köre, gece Rusiye arbiyleri Kyivge dron ve raketalarnen ücüm etkeni neticesinde eñ az yedi insan elâk oldı, elliden ziyade yaralandı. Akimiyet qurbanlarnıñ sayısı arta bile, dep tenbiley.
