Rusiyeniñ iyulniñ 31-nde saba Kyivge qarşı raketa ücümi neticesinde «Umma» Ukrayina musulmanları diniy idaresiniñ baş camisi ve İslâm medeniyet merkeziniñ binası zarar kördi. Yaralanğanlar yoq, dep bildirdi müfti Murat Suleymanov.
Onıñ aytqanına köre, bu cami cuma namazına biñlernen insannı toplağan Ukrayinanıñ eñ büyük camilerinden biri ola.
«Biz teslim olmaymız. Biz ğalebe qazanacağımıznı bilemiz, çünki bu bir adalet meselesi. Ukrayina endi zafer qazandı. Ve böyle areketlernen köremiz ki, olar (Rusiye arbiyleri – QA) küçsiz ola, olar tek vatandaşlarğa ura bileler, olar tek közyaş, ağrı ketirgen şeylerni yapa bileler. Şunıñ içün Allah olarnı bu ve kelecek ayatta cezalandıracaq», – dep yazdı Suleymanov.
Akimiyetniñ aytqanına köre, gece darbesi neticesinde eñ az altı kişi elâk oldı, yüzden ziyade yaralandı. Qıdıruv-qurtaruv işleri daa devam ete, hususan Svâtoşınskıy rayonında, anda Rusiye raketasınıñ ücümi neticesinde 9 qatlı binanıñ kirişi yıqıldı. Akimiyet qurbanlarnıñ sayısı arta bile, dep tenbiley.
Şeer yolbaşçısı Vitaliy Klıçko qurbanlar arasında doquz bala bar, dep bildirdi. Onıñ aytqanına köre, Kyivde büyük cenk başlağanından berli bir gecede yaralanğan balalarnıñ eñ büyük sayısı bu.
