Rusiye prezidenti Vladimir Putin internette ekstremist malümatını, em de VPN (virtual şahsiy ağlar) qullanıluvınen qıdıruv içün memuriy mesüliyetni kirsetken qanunnı imzaladı, dep haber ete Azatlıq Radiosınıñ Rus hızmeti.
2025 senesi sentâbrniñ 1-nden başlap böyle qıdıruv içün 3 biñden 5 biñ rublege qadar (tahminen 37-60 dollar) para cezası berile bile.
VPN ile bağlı ayrı maddeler bar. VPN aletleriniñ reklamasını tarqatqan vatandaşlarğa 50 biñden 80 biñ rublege qadar para cezası berile bile, vekâletli şahıslarğa – 80 biñden 150 biñge qadar, şirketlerge – 200 biñden 500 biñge qadar.
Artıq cinayette VPN qullanıluvı vaziyetni zorlaştıra.
Bağ naziri Maksut Şadayev yasaqlanğan malümatnı mahsus qıdırmağan adiy qullanıcılar qanunnıñ tesirine oğramaycaq. Onıñ aytqanına köre, er davada maqsadı ve qıdırılğan malümatnıñ ekstremist olğanını añlamağanı isbatlanmalı.
Baar sessiyasında Rusiye Federatsiyasınıñ Devlet duması siyasiy maddelerniñ bir qısmında cezalarnı sertleştirecek yañı repressiv qanunlarnı qabul etti. Soñki qararlardan biri – internette ekstremist malümatını qıdıruv içün mesüliyetniñ olması, artıq para cezaları berilecek.
